نصائح الخبراء للطلاب المقبلين على الثانويه العامة والازهرية

{ بسم الله الرحمن الرحيم }

{ السلام عليكم ورحمة الله وبركاته }.

{ اهلا بكل متابعينا من جميع انحاء العالم }

هذه التدوينة لم أكتبها بنفسى ولكن نقلتها عن شخص لديه الخبرة أنا مثلكم تماما

فى الثانوية الأزهرية وأتمنى من الله لى ولكم النجاح والتفوق وتحقيق أفضل الدرجات

  إقرا الرسالة   

السلام عليكم و رحمة الله و بركاته رسالتي لكل المقبلين للثانوية العامه والأزهرية سأحكى لكم قصتى فى هذه السنة الحمدلله خلصت 3 ثانوي و ربنا كرمني فوق ما اتخيل ، و جبت 99.39% علمي علوم ، الحمدلله .. رسالتي بقى : ف 3 ثانوي في 3 حاجات لازم تهتموا بيهم ،

  الجانب النفسي  ،  المذاكره  ،   علاقتك مع الله  

 .. بالنسبة للجانب النفسي : 3 ثانوي مش فارقة كتير عن باقي السنين غير انها : -

سنة اطول شوية و عايزة نفس طويل حبتين ، في ناس بيبقوا داخلين جد اوي يقفلوا الفيس و يرموا الموبايل و يعيشوا ف معسكر ، لو عملتوا كدا هتنفجروا و مش هتكملوا ، خليكم طبيعين ، ذاكروا فترة معينة و خدوا راحة ف نص اليوم مثلا ..

 بس متبقاش اكتر من المذاكرة اكيد - تاني حاجة : الضغط و التوتر اللي هتكونوا فيه بسبب المدرسين و الاهل و العيلة وعيلة العيلة مع احترامي لكل دول ، لو اهلكم من النوع اللي بيضغط اكتر او عايزين يشوفوكم كذا (اي مهنة) متفكروش ف كلامهم كتير عشان هيزود التوتر و الرعب ، ذاكروا و اعملوا كل اللي تقدروا عليه و متفكروش انكم عايزين تدخلوا الكلية الفلانية ، ده بيزود الضغط عليكم اكتر ، متقارنوش نفسكم بحد المذاكرة : - من اكبر الغلطات الل صحابي وقعوا فيها السنة دي انهم خدوا عند اكتر من مدرس ف نفس المادة ! حاولوا بقدر الامكان تاخدوا ف كل مادة مدرس واحد عشان تلاقوا وقت تذاكروا .. زي ما الشرح مهم المذاكرة كمان اهم - موضوع هذاكر مع اصحابي ده موضوع غير واقعي بالمرة 

- شباب او بنات - هتعدوا بالساعة و الساعتين ف سطر و باقي الوقت اكل و رغي و اسأل مجرب - حاولوا بقدر الامكان تنظموا وقتكم ، لو مش بتروحوا مدرسة ممكن تخلوا ايام فيها درسين ، المهم يبقي عندك يومين اجازة ف الاسبوع تذاكروا

  و تلموا الي وراكم . - امتحانات المدرسين بتاعت الشهر و الامتحانات الكبيرة بتبقى مهمة جدا و هى دي اللي بتعرفكم مستواكم الحقيقي . - حاولوا متغيبوش كتير عن حصص المدرسين و بالذات الحصص الاساسية ، الغياب يبقى لضرورة قصوى ، الا لو متأكدين ان الحصة مالهاش لازمة - حلوا اسئلة كتاب الوزارة 

- صحيح فيها اسئلة عقيمة ، بس ساعات بيجيبوا شبهها - اول بأول . - المواد اللي كلها ارقام - زي الفيزيا و الرياضة .. الخ - اهم حاجه فيها الحل ، حلوا كتير اوي ع قد ما تقدروا ، و بلاش تعقدوا نفسكم ، ابدأوا بتدريبات ليها حلول ، جربوا تحلوا و بعد كدا شوفوا الحلول و افهموها - نصوص العربي الحفظ تتحفظ اول بأول عشان لما بتتكوم بيبقى صعب حفظها - صعب مش مستحيل بس بتختلف من قدرات طالب للتاني - - ركزوا ع امتحانات ثانوية عامة للسنين اللي فاتت ، بيجيبوا شبهها دايما ، و متركزوش ع اسئلة الجرايد . * نصيحة للبنات : لو بتتابعي مسلسلات كتير 

- تركي ، كوري ، مكسيكي ، هندي .. الخ - يبقى ع بداية الدروس تحددي هو مسلسل واحد بس تتابعيه ، المسلسلات و الحاجات دي بتشغل التفكير من غير ما نحس ، و بتقلل التركيز علاقتنا مع ربنا - الصلاة : لو مش مواظبين ع الصلاة واظبوا عليها ، الجأوا لربنا و متتكسفوش ، لو عمرك ما صليت صلي دلوقتي ، مرة ف مرة هتواظب لوحدك و تحس بالذنب لو مصليتش ، لو اي انسان عمره ما ركعها و صلى لمدة اسبوع من غير ما يقطع هتبقى الصلاة بالنسبة له عبادة و عادة مش قادر يبطلها - صلاة الفجر طبعا مهمة و يا بخته اللي يقدر يقوم الفجر - الدعاء ، ادعوا و ماتكسلوش ، ادعوا دايما بإن ربنا يرزقكم مجموع الكلية اللي تقدروا تمشوا فيها - قراءة القرآن ، مش معنى ان رمضان خلص اننا نركن المصحف ع جمب ، الحمدلله كنت بقرا كل يوم ، ساعاتىمن ع المصحف و ساعات من ع الموبايل

 ان شا الله 5 آيات بس ، حاولوا تقروا كل يوم بعد اي صلاة مثلا ، المهم ميعديش 3 ايام من غير قرآن - وقت النسيان ف الامتحانات او اللخبطة ادعوا ربنا ، مش لازم دعاء معين ، قولوا اللي يجي ع بالكم . 

* فاكرة كويس ف امتحان الفيزيا كان في سؤال مش عارفة احله ، قعدت اقول ف سري يا رب ساعدني ، انا عارفة اني مستاهلش بس يا رب انت الكريم الرحيم ساعدني ، و الحمدلله ربنا الهمني بفكرة و عرفت احلها * - خلي نيتكم دايما صافية و ساعدوا الناس ، و بلاش الانانية ، ان مثلا فلان اقوله معلومة غلط و فانة مقولهاش ع اسم المدرس اللي باخد معاه و هكذا - اوعوا تتغروا ع حد لأن مستواكم اعلى او لأي سبب تاني ، و متنسبوش الفضل لنفسكم ، لأن الفضل فضل ربنا دايما . - الامتحانات اهم حاجة فيها الهدوء و برودة الاعصاب ، حل و كأنه امتحان عادي و ان شاء الله هتلاقوا احسن النتايج صحيح ان لكل مجتهد نصيب بس لما تكون علاقتكم بربنا كويسة ربنا هيبارك لكم ، هتلاقوا ربنا بيذكركم و اهم حاجه بيرضيكم بنصيبكم ايا كان آسفة ع الإطالة ، و ربنا يوفقكم جميعا . ملحوظة : انا كتبت اول رغبة صيدلة ، مع ان عمري ما دعيت اني ادخل صيدلة ،

دايما كنت ادعي يا رب ارزقني بكلية اعرف امشي فيها ، دعواتكم معايا ان ربنا يرزقني الكلية اللي اعرف انجح فيها ربنا و يكرمكم و يفرح قلوبكم يا رب

المصدر : المدونة
للابلاغ عن أى رابط لا يعمـل بلغ من هنـا
أتمنى أن ينال هذا الدرس اعجابكم كلمة شكر منك تجعلنا نقدم أفضل ما لدينا وتشجعنا على العمـل الجاد فلا تترك المدونة قـبل ترك تعليق
 وشكرا لزوارنا وأعضائنا الكرام انتظرونا فى دروس جديدة بإذن الله